MAXBUUS
Ma aan ahayn mid
fahma ujeedka nolosha balse waxa aan u noolaa in aan naf kale fikirkeeda, iyo
hindisaheeda ku noolaado. Haa waxaan ahaa Maxbuus, waxa aan ku jiray jeel cid
aad miciinsato aanad helayn, waa jeel ku yaalay badweyn dhexdeed waxa igu
hareeraysnaa biyo dhanaan kaliya argaygana waxa u muuqday maddawga badda,
hirarka hab dhaca sameeyaa waxa ay iila dhigmeen haar iyo hantaawilif, ma aan
lahayn dareen aan ku dareemo nolosha iyo macaankeeda sidaas oo kale waan laxaad
beelay haddana waan laxaad qabay.
Maanta sariir ayaan
badhtanka u saaranahay wax dhaqaaq ah ma lihi waxa I ritay xanuuno aan muddo
dheer la il-darnaa, dhamaan ehelkaygii wuu igu soo dul xoonsanyahay, ishaydu
dhinac walba waxa ay qabanysaa ama ay dheehanysaa dad aan soo wada qaadanay
wakhtiyo kala xusuus iyo xadanto badnaa farxad iyo raynrayna dheertahay,
dareenkayga iyo kooduba maanta wuu ka duwanyahay oo wajiyadooda murugo xoogan
ayaa ka muuqata, waxa ay ka dhiiloonayaan xaalladan adag ee aan ku suganahay ee
ayna waxba ka qaban karayn. Gacanta middig waxa aan haystaa Aragsan oo ah
gabadh aan abti u ahay oo aad mooddo inaan ubadkaba ka xigsan jiray. Marka aad
muuqaalkayga u soo noqoto cadkii jiidhkayga ku dahaadhnaa waxba kama sii muuqdo
lafahaygana waa aad dheehan kartaa, korka waxa aan ka xidhanahay garan ama hu’
uu ku sawiranyahay inkaar qabihii aan maxbuuska u noqday kaas oo igu sabaalayn
jiray iguna sooryayn jiray inaadeer iyo hadaladii booraanta igu riday isaga oo
yoolkiisu ahaa sidii uu sallaanka iiga dhigan lahaa, haa siyaasi ayuu ahaa oo
maantaba dadka igama yaqaan, lama filaan haddaan isha qac ugu siiyay sawirkiisa
anfariirkii aan ka qaaday iyo saskii aan sasay ehelkay waxa ay moodeenba in ay
naftiiba iga suushay.
Marka aad eegto
xaaladayda iyo ninkan aan korka ku sitaa waa labo aan islahayn, balse way
jirtay maalmo aniga oo awood iyo tamarba leh isaga dartii dad u nacay dadna u jeclaaday una soo
dhawaystay, fikirkiisana aan u qaatay dadnimadiina uga doorbiday reernimo, xaaladayda
oo u dhaxaysa geeri iyo nolol sakaraadkiina la socdo ayaan haddana markaan
sawirkiisa isha ku dhufto kolba aan soo hinqanayaa waxa ii waheliya mawjado
xasuuso ah oo igu soo laba kacaya qoomamona way ii dheertahay,waydiimooyin faro
baddan ayaa kaskayga ku soo dhacaya oo ay ka mid yihiin toloow wakhtigan
xaalkaaga ma la socdaa mise xumaantii aad ku ogayd ee aad ku jeclaatay ayuu ku
dhex jiraa?. Waxaan kolba leeyahay yaa awood ku siiyaa aad sawirkiisa iska
qariside haddana waxaan leeyahay yaa wakhtiga inyar dib kuugu soo cesha aad
camalkaagii hore hagaajiside ma hubo inaan
daqiiqadan aan noolaan doono, ma hubo in saacad naftu igu sii jiri maalmona
hadalkoodaba daa, Haddii aan sannad dib u noqon lahaa maan ahaadeen sallaan
sidoo kale maxbuusna umaan noqdeen, isbedel ayaan samayn lahaa waanan Xoroobi
lahaa.
W/Q:
KHALID MOHAMED SAID “KHALOUDY”
ALLEEN:
063-4459259
WWW.KHALOUDYM.BLOGSPOT.COM